Jahresbericht 2017



AG Plattdeutsch

De Liddmaten-List vun de Plattdüütsch-AG is teemlich konstant bleven: negen ni’e Liddmaten, aver ok acht, de nich mehr bi uns sünd (afmellt wg. Öller, vun mi streken wurrn oder dood); aktuell hebben wi en Stand vun 133. De Resonanz op Inladen liggt in ’n Dörchsnitt blots bi rd. 28 %. Bi absolute Highlights weeren dat ok mal 37 oder 42 %. Dat de Deelnehmertall bi unse Drapen liekers höger is, kümmt tostann, wiel dat bi jede tweete Deelnehmer de Partners oder ok Frünnen mit anmellt warrn.



De Kurs Plattdüütsch Lesen un Schrieven mit Annemarie Jensen in’t Börgerhuus Sörup harrn wi in de

April 2015 anfungen. In 2016 is de Kurs na fief Avenden to Enn gahn, denn wi funnen keen ni’e Deelnehmers as „Quereinsteiger“. Aver de Deelnehmers, de dor weeren (toeerst twölf, naher blots noch acht), hebben sik utföhrlich mit Schrievregeln un Textöven anhand vun Bispelen befatet un hebben en Barg leert för de Ümgang mit de plattdüütsche Schrift un Spraak.

En plattdüütsche Goddesdeenst in de Harvst mit ‘n Mittagsmahltiet achterran heff ik nich organiseeren kunnt, wiel dat ik Preesters, Kirchen un groote Gasthüüs nich op een Nenner kreeg.

Dorför harrn wi denn middags an ‘n 06.11.2016 en Gröönkohleten in de Harvsttiet mit Programm un Klöönsnack in ’t Dörpskrog „Zur Kastanie“ in Schnarup-Thumby mit 78 Deelnehmers. De Kröger harr de Saal fein för uns torecht maakt un en heel lecker un riekliche Gröönkohl-Büfett opboot. Lütte Pausen wurrn dörch eegene Vordrääg un Vörlesen vun enkelte Platt-AG-Liddmaten utfüllt.

För en Extra-Programmpunkt harrn wi Georg Bonsen ut Rabel engageert. As Hobbyfotograf hett he uns sein wunnerbore Dias vun Deerten un Landschopen in Angeln wiest un allens op Plattdüütsch verkloort un kommenteert. De Natur in Angeln keem to uns in de Festsaal.

An de 18.01.2017 harrn wi en Literarische Namiddag in Nübelfeld in ’t Café Kommodig, Landhuus

Schütt. Annemarie Jensen hett leest un vertellt vun Hermann Claudius (1878–1980), Urenkel vun Matthias Claudius. He weer Lehrer un ok Schriever vun Kinnergeschichten un vun Lyrik in swore Tieden un vun politisch intressante platt- un hochdeutsche Texten. De 62 Deelnehmers kregen en spannende un anspruchsvulle Vördrag to hören. För de mehrsten vun uns weer dat vördem nich

bekannt. Twischendörch geev dat Kaffe, lecker Tortenstücken un Keesbrötchen. Un dorbi weer Tiet för uns,dat wi snacken kunnen över dat, wat wi hört harrn.

An ’n 21.03.2017 keem de Platt-AG üm Klock ölven in ’t Landgasthuus Nükrog in Maasbüll to en

Fröhjohrs-Drapen mit 53 Deelnehmers tosamen. Ditmal hebben negen Liddmaten vun de Platt-AG dat Programm alleen maakt. Sülvst verfatete Geschichten un Erlebnisberichte – deelwies as Riemels – oder Bidrääg ut Warken vun bekannte plattdüütsche Schrievers wurrn vördragen oder vörlesen. De enkelten Vördrääg duerten sowat bi fief bit 15 Minuten. Jedereen, de wat to ’n Besten geev,

kreeg en Zertifikat mit Dank un Loff un ok en Ansteker ‚Ik snack ok Platt‘. In ’e Middagspaus geev dat klassische Festdaagsbraden mit twee Slag Fleesch, Gröönsaken, Kantüffeln un Soß. Üm un bi Klock half dree gung de Namiddag vergnööglich to Enn.

To Maidag harr Claus-Peter Petersen wat ganz besünneres för uns: en Kirchenföhrung op Platt.

Wi drepen uns an de 16.05.2017 um Klock half dree in de Kirch vun Niekarken. De Preester Philipp Reinfeld leet sik dat nich nehmen, uns to begröten un en lütte Andacht to holen. As rein hochdüütsche Mann hett he dennoch en Deel op Platt vördragen. Un wiel dat he keen Orgelspeeler dorbi harr, hett he sein Gitarr ümhungen un in de Saiten grepen. Bidat kreeg unse Gesang so richtig Farv.

Claus-Peter Petersen wohnt siet Geboort in Niekarken un weet veel över de Dörpsgeschicht. He hett uns mit sein Vördrag eerstmal torüchholt in de Johren üm 1621, as de Kirch vun Herzog Johann de Jüngere boot wurrn is – en sünnerliche Sakral-Bo vun historische Bedüden un en Smuckstück an de Waterkant. Wi kregen to weten, wat allens in meist 400 Johren mit de Kirch un in dat Dörp passert is un wat sik entwickelt hett. De architektonischen Besünnerheiten wurrn uns verkloort un wi wurrn henwiest op sakrale Gegenstände in de Kirch. Spannende annerthalf Stünnen gungen bannig gau rüm.

Achterna geev dat Kaffe un Platenkoken un jedereen harr Gelegenheit, un tuschen Gedanken ut.

Intwischen weer de Regen vörbi un männigeen het sik noch de Kirchhoff un de Anlaag mit de Gedenksteens för de Doden un Vermissten ut de beiden Weltkriegen ankeken. Annern weren ok noch de Strandtrepp an de Steilküst daal na ’t Haff.

Op de Internetsieden vun de Plattdüütsch- AG in de Homepage bi de HV Angeln warrn ümmer de aktuellen Tipps un Termine bekanntgeven. Dor sünd ok wedder en poor ni‘e Biller vun Platt-AG-Veranstaltungen ut 2017 to sehn.

Erich Petersen

Arbeitsgemeinschaft für Plattdeutsch

AG-Leiter: Erich Petersen, Ebenezer-Howard-Allee 8e, 24941 Flensburg, Tel.: 0461 / 50548462

Veranstaltungen siehe unter Termine!

Fotos von den Aktivitäten dieser AG finden Sie in der Galerie


Newsletter