Gröten vun Marianne Ehlers

Leve Frünnen vun de plattdüütsche Spraak,

nich mehr lang, denn kiekt wi uns de Lichten vun uns Dannenbööm an – wi freut uns op en poor kommodige Daag. Ik wünsch Se all vun Harten, dat Se sik en beten verpusten köönt – dat Se wedder Knööv kriegen köönt för dat tokamen Johr.

För de Plattdüütschen weer 2014 en godes Johr – wi hebbt en Barg beschicken kunnt, wi hebbt vele schöne Veranstaltungen hatt, wo wi sülven mit bi ween sünd oder as Besökers deelnehmen kunnen. In de Sprakenpolitik sünd wi bi dat grote Thema „Bildung“ en düchtig Stück wiederkamen. Mit Stolt kiekt wi op de Scholen in uns Land, wo nu Platt op den Stünnenplaan steiht.

De Arbeit in uns Gremien hett Freud maakt – wi treckt all an en Tau un sünd uns eenig: dat lohnt sik, för uns Regionalspraak Nedderdüütsch to strieden un to arbeiden. So warrt en goden Weg in de Tokunft torechtmaakt in uns Sprakenland Sleswig-Holsteen. 2015 schall nu dat „Medienjohr“ warrn – wi stellt Fragen un söökt na en goden Weg, för de Spraak in all de Medien en starken Anker to setten.

De Plattdüütsch Stiftung Sleswig-Holsteen hett ehr Arbeit opnahmen – en schöne Arbeit, wenn dat gellt, bunte Kisten vull Platt för Scholen un Kinnergoorns to packen, Platt to’n Anfaten un to’n in de Hand nehmen. Ok hier gifft dat vele Ideen, wat een noch maken kann. Bitte snackt Se mi in dat tokamen Johr eenfach mal an.

Mien Dank gellt vundaag  all de, de mitholpen hebbt, dat de Spraak an de een oder anner Steed opdükern kunn – an all de, de aktiv in de Gremienarbeit dorbi weren, so as in’n Plattdüütschen Raat för Sleswig-Holsteen, in den Utschuss för Nedderdüütsch un Freesch, in den Stiftungsraat – man ok an all de, de bi sik tohuus, in Kreis, Stadt oder Dörp för Platt in de Gang sünd.

In den Anhang finnt Se en Reeg vun Platt-Veranstaltungen för 2015 – vun den SHHB oder mit den SHHB dorbi. Seker is ok för Se  wat dorbi.

Besünners henwiesen müch ik op twee Terminen an’n Anfang vun dat Johr 2015:

Plattdüütsch Schrieven
Einmal durch die plattdeutsche Rechtschreibung
Martinshaus Rendsburg
Leitung: Peter Nissen
Sonnabend, 17. Januar 2015, 10.00 Uhr – 16.00 Uhr

Plattdüütsch Vördrägen
Techniken und Tipps für Vortragende
Martinshaus Rendsburg
Leitung: Hartmut Cyriacks
Sonnabend, 14. Februar 2015, 10.00 Uhr – 16.00 Uhr

För beide Termine köönt Se sik geern al anmellen. Anfang 2015 geiht noch mal en extra Inladen rut.

Wat vele vun uns ümdrieven mag in düsse Daag, de Gedanken finnt Se in dat Gedicht „Wünschen“ as tweten Anhang. Wi wöllt an all de Lüüd denken, de dat nich so goot geiht, de ahn Heimat sünd. Un wi wöllt ehr hölpen, so as dat jedereen kann, un de Arms apen maken.

Mit de besten Wiehnachtsgröten un dat Allerbeste för 2015

Ehr
Marianne Ehlers
Referentin för Nedderdüütsch un Freesch
Schleswig-Holsteinischer Heimatbund
Hamburger Landstraße 101
24113 Molfsee
Tel. 0431- 98 384-15

 

Newsletter